Reykhólahreppur

Mynd sem sýnir Reykhólahrepp.

Reykhólahreppur samanstendur af annars vegar íbúum í sveitinni sem margir stunda búskap annað hvort eingöngu eða meðfram annarri vinnu, mest er um sauðfjárrækt en einnig eru nokkur kúabú og hins vegar íbúum þorpsins sem sækja vinnu í þorpinu en líka utan þess. Á Stað á Reykjanesi er hægt að kaupa beint frá býli; reyktan rauðmaga, bjúgu, heimagert rúgbrauð og hangikjöt til að nefna nokkuð. Bjarkalundur er elsta sumarhótel landsins, var byggt 1945-1947 og er í seinni tíð þekkt sem bakland þáttanna Dagvaktin og stendur þekkt bifreið úr þáttunum, Læðan fyrir utan Bjarkalund.

Í Króksfjarðarnesi er lögð stund á bláskelsræktun og á Karlsey sem liggur utar Reykhólaþorpsins er lítil höfn og þar eru Þörungaverksmiðjan sem framleiðir mjöl úr klóþara og hrossaþangi úr Breiðafirði og nýtir heita vatnið á svæðinu til þurrkunar og saltverksmiðjan Norðursalt sem vinnur salt úr Breiðafirði og nýtir affallsheitavatnið frá Þörungaverksmiðjunni við þurrkun á saltinu.
Á Reykhólum er m.a. leik- og grunnskóli, elliheimili, kirkja, verslun, gróðurhús, gistiheimili, sundlaug, tjaldstæði, lítil báta- og hlunnindasýning með kaffihúsi, Sjávarsmiðjan þar sem hægt er að fara í þaraböð og fá veitingar.

Björgunarsveitin Heimamenn stendur vaktina bæði fyrir heimafólk sem og ferðamenn og kvenfélagið Katla sem er mjög öflugt og stendur fyrir alls kyns viðburðum og styrkjum til fjölmargra í sveitarfélaginu.
Nafnið Katla er dregið af þjóðsögunni Kötludraumur. Nokkrar útgáfur eru til af sögunni og mislangar og einnig er hún til í kvæðabálki en í mjög stuttu máli er þjóðsagan um Kötlu sem var gift Má og bjuggu þau á Reykhólum. Eitt sinn sofnaði Katla og var ekki hægt að vekja hana í nokkra daga en þegar hún loks vaknaði var hún ekki með sjálfri sér og sagði síðan manni sínum að huldukonan Alvör hefði sótt hana, farið með hana í bát yfir að Þverá og þar var hún gift syni Alvarar, huldumanninum Kára. Hann unni Kötlu en hún vildi snúa tilbaka til Más. Eftir nokkrar nætur í rekkju Kára segir hann henni að hún muni fæða dreng og vill að hún nefni hann Kára. Sagði Kári henni líka að flytja bústaðinn og búa við stóra þúfu sem yrði féþúfa þeirra Kötlu og Más. Síðan fer Katla tilbaka til Más og Kári springur af harmi. Katla eignaðist einkar frítt sveinbarn sem Már feðraði og var góður við en Katla fremur fálat við. Sagt er að Alvör hafi oft angrað Kötlu þar sem hún kenndi henni um hvernig fór fyrir Kára syni sínum en Katla tók á það ráð að snúa bæjardyrunum á Reykhólum þannig að þær snéru upp til fjallsins svo að hús Alvarar myndi ekki blasa við henni. Katla vildi ekki fara í Reykhólalaugina sem sneri í suður því þá fannst henni hún of nálægt híbýlum Alvarar og fór frekar alllangt frá bænum og baðaði sig í einstakri laug sem heitir enn Kötlulaug.